விவரிக்க முடியாத விந்தைகளும், பூனை பற்றிய சுவாரஸ்யமான உண்மைகளும்!
ஒவ்வொரு ஆண்டும் ஆகஸ்ட் 8-ஆம் தேதி சர்வதேச பூனை தினம் (International Cat Day) உலகெங்கிலும் உள்ள பூனைப் பிரியர்களால் கொண்டாடப்படுகிறது. மனிதர்களின் மிக நெருங்கிய செல்லப்பிராணிகளில் ஒன்றான பூனைகளின் நலனைக் காக்கவும், அவற்றுக்கு எதிரான கொடுமைகளைத் தடுத்து விழிப்புணர்வு ஏற்படுத்தவும் 2002-ம் ஆண்டு ‘சர்வதேச விலங்கு நல நிதியம்’ (IFAW) மூலம் இந்த நாள் உருவாக்கப்பட்டது.
பூனைகள் வெறும் செல்லப்பிராணிகள் மட்டுமல்ல; அவை நம் மன அழுத்தத்தைக் குறைக்கும் அற்புத தோழர்கள். இந்த சிறப்பான நாளில் பூனைகளின் விசித்திரமான நடத்தைகள் மற்றும் பலரும் அறியாத சில சுவாரஸ்யமான தகவல்களைப் பற்றிப் பார்ப்போம்.
🐱 பூனைகளின் விசித்திரமான நடத்தைகள் (Cat Behaviours & Meanings)
- வால் ஆட்டுவது (Tail Wagging): நாய்கள் மகிழ்ச்சியாக இருக்கும்போது வாலை ஆட்டும். ஆனால், பூனைகள் கோபமாகவோ அல்லது எரிச்சலாகவோ இருக்கும்போதுதான் தன் வாலை வேகமாக ஆட்டும்.
- மெதுவான கண் சிமிட்டல் (Slow Blink): உங்கள் பூனை உங்களைப் பார்த்து மெதுவாகக் கண் சிமிட்டித் திறந்தால், அது உங்கள் மீது முழுமையான அன்பையும் நம்பிக்கையையும் வெளிப்படுத்துகிறது என்று அர்த்தம். இதை பூனைகளின் “ஐ லவ் யூ” (I love you) என்று சொல்லலாம்.
- பெட்டிக்குள் உட்காரும் ஆர்வம் (Box Obsession): பூனைகளுக்கு அட்டைப் பெட்டிகள் என்றால் தனிப் பிரியம். சிறிய பெட்டிக்குள் தன்னை அடக்கிக்கொள்வது அவற்றுக்கு பாதுகாப்பான உணர்வையும், மன அழுத்தத்திலிருந்து விடுதலையையும் தருகிறது.
- ‘மியாவ்’ ஒலிகள் (Meowing): பூனைகள் தங்களுக்குள் பேசிக்கொள்ள ‘மியாவ்’ என்று கத்துவதில்லை. அவை மற்ற பூனைகளுடன் வாசனைகள் மற்றும் உடல் மொழி மூலமாகவே தொடர்புகொள்ளும். மனிதர்களிடம் தனக்கு உணவு அல்லது தேவைகளைக் கேட்க மட்டும்தான் அவை ‘மியாவ்’ சத்தத்தைப் பயன்படுத்துகின்றன.
🐱 பூனைகள் பற்றிய சுவாரஸ்யமான & அறியப்படாத உண்மைகள் (Interesting & Unknown Facts)
- பூனைகள் தங்கள் வாழ்நாளில் தோராயமாக 70 சதவீத நேரத்தைத் தூங்குவதிலேயே கழிக்கின்றன. அதாவது, ஒரு பூனை தன் வாழ்நாளில் 9 ஆண்டுகள் தூங்கிக் மட்டுமே செலவிடுகிறது!
- மனிதர்களின் கைரேகைகளைப் போலவே, ஒவ்வொரு பூனையின் மூக்கில் உள்ள ரேகைகளும் (Nose Print)
- தனித்துவமானது. எந்த இரண்டு பூனைகளின் மூக்கு ரேகையும் ஒன்றாக இருக்காது.
- மனித உடம்பில் 206 எலும்புகள் உள்ள நிலையில், ஒரு வளர்ந்த பூனையின் உடலில் 230 எலும்புகள் உள்ளன. குறிப்பாக அவற்றின் முதுகெலும்பு மிகவும் நெகிழ்வுத்தன்மை வாய்ந்தது.
- பூனைகளுக்கு மனிதர்களைப் போல உடல் முழுவதும் வியர்வைச் சுரப்பிகள் கிடையாது. அவற்றின் உடம்பில் வியர்க்கும் ஒரே இடம் அவற்றின் கால்களின் பாதங்கள் (Paws) மட்டும்தான்.
- பூனைகளால் தங்கள் காதுகளை 180 டிகிரி கோணத்தில் சுழற்ற முடியும். எந்த திசையிலிருந்து சத்தம் வருகிறது என்பதைத் துல்லியமாகக் கண்டுபிடிக்க இது உதவுகிறது.
- ஆச்சரியப்படும் விதமாக, நம் வீட்டில் வளர்க்கும் சாதாரணப் பூனைகளின் டி.என்.ஏ (DNA) அமைப்பு, காட்டிலுள்ள புலிகளின் டி.என்.ஏ-வுடன் 95.6% ஒத்துப்போகிறது!
இந்த சர்வதேச பூனை தினத்தில், நம்முடன் வாழ்ந்து நமது வாழ்வை அழகாக்கும் இந்த அழகான உயிரினங்களுக்கு அன்பு செலுத்துவோம்; ஆதரவற்ற பூனைகளைப் பாதுகாப்போம்!
Article By – RJ SURIYAPRIYA
